དགུན་གྱི་དུས་སུ་རྩྭ་ཐང་གི་ཁ་དབུགས་ལ་རླན་ཉུང་བ་དང་། རྩྭ་དང་རྩི་ཤིང་ནགས་ཚལ་སོགས་སྐམ་སྲད་དུ་གྱུར་ཡོད་པའི་སྟབས་ཀྱིས་མེ་སྐྱོན་འབྱུང་བའི་ཉེན་ཁ་ཧ་ཅང་ཆེ། དེའི་ཁར་དགུན་དུས་སུ་རླུང་ཤུགས་ཧ་ཅང་ཆེ་བས། གལ་ཏེ་མེ་སྐྱོན་བྱུང་ཚེ་རྩྭ་ཐང་ཧྲིལ་བོར་དེ་འཕྲལ་མེ་མཆེད་པར་གྱུར་ནས། མི་དང་ཕྱུགས་ཟོག རི་སྐྱེས་སྲོག་ཆགས། སྐྱེ་ཁམས་ཁོར་ཡུག་བཅས་ལ་གནོད་སྐྱོན་ཚབས་ཆེན་ཐེབས་སྲིད་པར་མ་ཟད། ས་གནས་མང་ཚོགས་ལ་དཔལ་འབྱོར་གྱི་གྱོང་གུད་ཆེན་པོ་བཟོ་སྲིད་པས། མེ་འགོག་འདུ་ཤེས་དུས་ཚིགས་བཞི་བོར་ཡིད་ལ་འཇགས་པར་བྱ་རྒྱུ་གལ་ཆེ་བར་མ་ཟད།དགུན་དུས་སུ་དེ་བས་ཀྱང་མེ་སྐྱོན་ལ་དོགས་ཟོན་ནན་མོ་བྱ་དགོས་སྟབས། གཤམ་དུ་དགུན་གྱི་དུས་སུ་རྩྭ་ཐང་ནས་མེ་སྐྱོན་ཇི་ལྟར་སྔོན་འགོག་བྱེད་པའི་ཐད་ཀྱི་རྒྱུན་ཤེས་འགའ་དགོད་པར་བྱའོ།།
གཅིག ཕྱི་ལོགས་ནས་མེ་སྤྱོད་པ་གཏན་འགོག་བྱེད་དགོས།
དགུན་དུས་སུ་རྩྭ་ཐང་ནས་མེ་སྤྱོད་པ་ལ་ཤིན་ཏུ་གཟབ་གཟབ་བྱ་དགོས་ཤིང་། ལྷག་པར་དུ་ཕྱི་ལོགས་ནས་མེ་སྤྱོད་པ་བཀག་སྡོམ་ནན་མོ་བྱ་དགོས་པ་སྟེ།རྩྭ་ཐང་དུ་ཐ་མག་འཐེན་པ་དང་། དུ་སྣེ་གང་བྱུང་དུ་གཡུག་པ། བསང་གཏོང་བ། མེ་འབུད་པ། གད་སྙིགས་མེར་སྲེག་པ་སོགས་ཀྱི་བྱ་སྤྱོད་གཏན་འགོག་བྱེད་དགོས།
གཉིས། མེ་ཟོན་གྱི་འདུ་ཤེས་མཐོར་འདེགས་གཏང་དགོས།
རྩྭ་ཐང་དུ་ཡོང་བའི་རླངས་འཁོར་དང་མི་སྣ་ལ་གསལ་འདེབས་དང་དྲན་སྐུལ་ནན་མོ་བཏང་སྟེ། རྩྭ་ཐང་དུ་མེ་སྤྱོད་པའི་བྱ་སྤྱོད་གཏན་འགོག་བྱ་དགོས་པར་མ་ཟད། རྩྭ་ཐང་གི་འབྲོག་པ་མང་ཚོགས་དང་། ལྷག་པར་རྫི་བོ་དང་བྱིས་པ་རྣམས་ལ་མེ་སྐྱོན་འགོག་པའི་ཁ་ཏ་སློབ་གསོ་ནན་མོ་བཏང་ནས་མེ་ཟོན་གྱི་འདུ་ཤེས་མཐོར་འདེགས་གཏང་དགོས།
གསུམ། མེ་སྐྱོན་འབྱུང་བའི་མངོན་མེད་ཉེན་ཁ་མེད་པར་བཟོ་དགོས།
རྩྭ་ཐང་གི་ཐོན་སྐྱེད་དང་འཚོ་བ་ལ་སྤྱོད་པའི་མེ་ལ་དོ་དམ་ཡག་པོ་བྱ་དགོས་པ་དང་། མེ་སྤྱད་པའི་མེ་རོ་རྩ་བ་ནས་བསད་དེ་མེ་སྐྱོན་འབྱུང་བའི་མངོན་མེད་ཉེན་ཁ་མེད་པར་བཟོ་དགོས་པར་མ་ཟད། དུས་བཅད་ལྟར་རྩྭ་ཐང་གི་གློག་འདྲེན་སྐུད་ལམ་ལ་ཞིབ་བཤེར་ནན་མོ་བྱས་ཏེ། གློག་སྐུད་རྙིང་འགྱུར་དང་གློག་སྐུད་ཆད་པ་ལས་བྱུང་བའི་མེ་སྐྱོན་སྔོན་འགོག་བྱེད་དགོས།
བཞི། འཕྲལ་བསྟུན་སྙན་ཞུའི་རྒྱུ་ལམ་ཤར་གཏོང་བྱེད་དགོས།
ལས་ཁུངས་དང་མི་སྒེར་གང་ཡིན་རུང་རྩྭ་ཐང་ལ་མེ་སྐྱོན་བྱུང་བའི་གནས་ཚུལ་ཤེས་ཚེ། དེ་མ་ཐག་ཏུ་ས་གནས་དེའི་མེ་སྐྱོན་ཉེན་ཞུའི་ཁ་པར་རམ་ཡང་ན་རྩྭ་ཐང་མེ་འགོག་ལས་རེས་ལ་ཁ་པར་གཏང་དགོས། མེ་སྐྱོན་སྙན་ཞུ་བྱེད་སྐབས་མེ་སྐྱོན་བྱུང་སའི་གནས་དང་། མེ་སྐྱོན་བྱུང་ཡུལ་གྱི་རྒྱ་ཁྱོན། རླུང་གི་ཁ་ཕྱོགས་དང་མེ་སྐྱོན་མཆེད་པའི་གནས་ཚུལ་སོགས་གསལ་པོར་བཤད་ནས། མེ་འགོག་མེ་གསོད་ལ་དུས་ཚོད་བརྩོན་ལེན་བྱ་དགོས།
ལྔ། རང་སྐྱོབ་དང་ཕན་ཚུན་སྐྱོབ་པའི་རྒྱུན་ཤེས་ཁོང་དུ་ཆུད་དགོས།
གལ་ཏེ་རྩྭ་ཐང་ནས་མེ་སྐྱོན་དང་ཕྲད་ན། དངངས་འཚབ་མི་བྱེད་པར་སེམས་ལྷོད་ལ་ཕབ་སྟེ་མྱུར་ཏུ་རླུང་གི་ཁ་ཕྱོགས་ཐག་གཅོད་དགོས་ལ། ངེས་པར་དུ་རླུང་གི་ཁ་ཕྱོགས་ཀྱི་ལྡོག་ཕྱོགས་དང་ཟུར་ཕྱོགས་སུ་བྲོས་ནས། ས་སྟོང་ཁོད་ཡངས་ས་དང་རྩྭ་དང་རྩི་ཤིང་མེད་སའི་ཐང་སྐྱ་སྐམ་པོའི་གནས་སུ་སྡོད་དགོས་པ་ལས། རླུང་གི་རྒྱུ་ཕྱོགས་སུ་གཏན་ནས་འབྲོ་མི་རུང་།
དྲུག དམངས་ཡོངས་མཉམ་ཞུགས་ཀྱིས་མེ་སྐྱོན་སྔོན་འགོག་བྱེད་དགོས།
རྩྭ་ཐང་གི་མེ་སྐྱོན་སྔོན་འགོག་བྱེད་པར་མི་ཚང་མར་འགན་འཁྲི་ཡོད། ས་གནས་མང་ཚོགས་དང་། ཁེ་ལས་ལས་ཁུངས། དེ་མིན་རྩྭ་ཐང་ནས་འགྲོ་འོང་བྱེད་མཁན་བཅས་ཚང་མས་རང་འགུལ་གྱིས་མེ་འགོག་སྒྲིག་སྲོལ་བརྩི་སྲུང་ནན་ཏན་དང་། ཧུར་ཐག་གིས་མེ་འགོག་དྲིལ་སྒྲོག་ལྟ་སྐུལ་ཁྲོད་ཞུགས་ཏེ། ཐུན་མོང་གིས་རྩྭ་ཐང་གི་སྐྱེ་ཁམས་ཁོར་ཡུག་བདེ་འཇགས་སྲུང་སྐྱོབ་བྱས་ཏེ་མེ་སྐྱོན་འབྱུང་བ་སྔོན་འགོག་བྱེད་དགོས།
