ད་ལྟའི་འཚོ་བ་ཇེ་རྒྱས་ཇེ་ལེགས་སུ་སོང་བ་དང་བསྟུན་ནད་རིགས་ཀྱང་སྣ་ཚོགས་འབྱུང་བཞིན་ཡོད། དེ་ན་ཞོལ་ནས་སྤྱོད་ལམ་གང་དག་གིས་མཆིན་པར་གནོད་པའི་སྐོར་གྱི་རྒྱུན་ཤེས་འགའ་ངོ་སྤྲོད་ཅིག་བྱེད།
གཅིག ཆང་བག་མེད་དུ་འཐུང་བ།
མཆིན་པ་ནི་ཆང་བཅུད་རྙིང་ཚབ་གསར་བརྗེ་ཐུབ་པའི་དབང་པོ་གཅིག་པུ་ཡིན་ལ། ཆང་བཅུད་དབྱེ་འབྱེད་བྱེད་སྐབས། ཞག་ཚིལ་མཆིན་པའི་ཕྱི་རུ་ཕུད་དཀའ་བས། མཆིན་པའི་ཁྲག་གཤེར་གཙང་སྒྱུར་གྱི་ནུས་པ་ཇེ་ཆུང་དུ་འགྲོ་བ་དང་ལུས་སྟེང་གི་དུག་རྒྱུ་ཇེ་མང་དུ་འགྲོ་བ། མཆིན་པར་གནོད་འཚེ་ཐེབས་པ་བཅས་ཀྱི་དབང་གིས་དུས་ཡུན་རིང་པོར་ཆང་འཐུང་ན་ཆང་བཅུད་རང་བཞིན་གྱི་ཞག་ཚིལ་མཆིན་ནད་དང་མཆིན་པ་སྲ་འགྱུར་གྱི་ནད་འབྱུང་སྲིད།
གཉིས། དུས་རྒྱུན་གཉིད་ཆགས་པ།
མཚན་མོ་ནི་མཆིན་པ་སླར་གསོ་འབྱུང་བའི་དུས་ཡིན་ལ། གཉིད་པའི་གོམས་གཤིས་ཡག་པོ་ཆགས་པར་བྱས་ནས། མཆིན་པའི་ཁག་ཁུར་ཇེ་ཡང་དུ་གཏོང་དགོས།
གསུམ། བཟའ་བཏུང་ལུགས་མཐུན་མིན་པ།
དུས་ཡུན་རིང་པོར་ཚ་ནུས་དང་ཞག་ཚིལ་མཐོ་བའི་ཟས་རིགས་ཟོས་ན། ཕོ་རྒྱུའི་ཁག་ཁུར་ཇེ་ལྗིར་གཏོང་བར་མ་ཟད། མཆིན་པའི་ཁག་ཁུར་ཡང་ཇེ་ལྕི་རུ་བཏང་ནས། ཞག་ཚིལ་རྣམས་མཆིན་པར་འདུས་ནས་ཕྱིར་ཕུད་དཀའ་བ་དང་། མཆིན་པ་ཚིལ་འགྱུར་འབྱུང་བར་ཆ་རྐྱེན་བསྐྲུན་སྲིད། དེ་ལས་གཞན་རླམ་ཆགས་པ་དང་ཚོས་མ་རློན། འཚིག་པའི་ཟས་རིགས་ཟོས་ན་དེའི་ཁྲོད་ཀྱི་སྐྲན་སློང་དངོས་པོས་མཆིན་པའི་བདེ་ཐང་ལ་ཤུགས་རྐྱེན་ངན་པ་ཐེབས་སྲིད་པས། དུས་རྒྱུན་གྱི་འཚོ་བའི་ཁྲོད་མི་ཚང་མས་བདེ་ཐང་གི་བཟའ་བཏུང་དང་འཚོ་བཅུད་དོ་མཉམ་ཡོང་བར་མཐོང་ཆེན་བྱེད་དགོས།
བཞི། སྨན་རྫས་གང་འདོད་དུ་སྤྱོད་པ།
མཆིན་པ་ནི་མིའི་ལུས་སྟེང་གི་དུག་སེལ་དབང་པོ་གལ་ཆེན་ཞིག་ཡིན་པས། སྨན་པའི་མཛུབ་སྟོན་འོག་ལུགས་མཐུན་སྒོས་སྨན་སྤྱོད་དགོས་ལ། ནད་མེད་ན་སྨན་གང་འདོད་དུ་སྤྱོད་མི་རུང་ཞིང་། མཆིན་པའི་ཁག་ཁུར་ཇེ་མང་དང་འགྱུར་འབྱུང་མི་ལེགས་པའི་ཉེན་ཁ་འབྱུང་བར་སྔོན་འགོག་བྱེད་དགོས།
ལྔ། དུས་ཡུན་རིང་པོར་སེམས་ཁམས་མི་སྐྱིད་པ།
ཀྲུང་ལུགས་སྨན་པས་དུས་རྒྱུན་ཁོང་ཁྲོ་ཆེན་པོ་ལངས་ན་མཆིན་པར་གནོད་ཅེས་བཤད་པ་རེད། ཁོང་ཁྲོ་དང་སེམས་ཁུར་སོགས་ལྡོག་ཕྱོགས་སེམས་ཁམས་ཀྱིས་མཆིན་པར་གནོད་འཚེ་བཟོས་ནས་མཆིན་པའི་བྱེད་ནུས་རྒྱུན་ལྡན་མིན་པར་གཏོང་སྲིད། དེའི་རྐྱེན་གྱིས་སེམས་ཁམས་སྐྱིད་པོ་ཡོང་བར་འབད་རྒྱུ་ནི་ཤིན་ཏུ་གལ་ཆེ།
རྩོམ་སྒྲིག་པ། གཡང་མོ་སྒྲོལ་མ།
